من تلاش ميكنم پس هستم

چوخلار اينجيكدي كي٬ سن اونلارا ناز ايله ميسن
من ده اينجيك كي٬ منيم نازيمي آز ايله ميسن
ائتميسن نازي بو ويرانه كونولده سلطان
ائوين آباد اولا٬ درويشه نياز ايله ميسن
هر باخشدا چاليبان كيپريگي مضراب كيمي
بير قولاق وئر٬ بو سينيق قلبي نه ساز ايله ميسن؟
باشدان آچ يايليغي٬ افشان ائله سوسن ـ سنبل
سن بيزيم بايرامميز سان قيشي ياز ايله ميسن
سن گون اول٬ قوي غميميز داغدا قار اولسون٬ اريسين
منيم آنجاق ايشيمي سوز و گداز ايله ميسن
من بو معناده غزل يازمالي حاليم يوخودي
سن جوجوق تك قوجاني فرفره باز٬ ايله ميسن
كاكلي باشدا بوروب باغلاميسان تاج كيمي
او قيزيل ساچدان اونا٬ گوللي قوتاز ايله ميسن
سينه بير دشت مغان دير٬ قوزي يان ـ يانه ياتيب
منيم آغلار گوزومي٬ اوردا آراز ايله ميسن
بو گوزليك كي جهاندا سنه وئرميش تانري
هر قدر ناز ائله سن ايله٬ كي آز ايله ميسن
مني بو سوز يله آتدين٬ آرالاندين بيليرم
آراني بير پارا نامرديله ساز ايله ميسن
دستماز ايله ديگين چشمه٬ مسيحا قاني دير
بيلميرم هانسي كليساده نماز ايله ميسن؟
من «عشيران» اوخوسام٬ پنجه «عراق» اوسته گزه ر
گوزليم٬ «ترك» اولالي٬ ترك «حجاز» ايله ميسن
تازا شاعر٬ بوده نيز هر نه باخرسان ديبي يوخ
چوخ اوزاتسان بوغازي٬ أورده گي قاز ايله ميسن
بسكه زلف و خط و خالين قوپالاغين گؤتدون
زلفعلي نين باشيني آزقالا دار ايله ميسن
گل! منيم ايسته ديگيم كعبه ييخلماز٬ اوجالار
باشدادا كژ گئده سن٬ ديبده تراز ايله ميسن
خط و خاليندن آليب مشقيمي قرآن يازارام
بو حقيقت له مني٬ اهل مجاز ايله ميسن
مني٬ دان اولدوزي٬ سن ياخشي تانيرسان كه سحر
افقي خلوت ائديب راز و نياز ايله ميسن
«شهريار» ين داغليب٬ داغدا داشا دالدالانيب
ئوزون انصاف ايله٬ محمودي اياز ايله ميسن

ايذن وئر توي گئجه‌سي من ده سنه دايه‌گليم
ال قاتاندا سنه مشاطّه تماشايا گليم.
سن بو آيلي گئجه‌ده سئيره چيخان بير سرو اول.
ايذن وئر من‌ده دالينجا سورونوب سايه گليم.
منه ده باخدين او شهلا گؤزوله ، من قارگون،
جورئتيم اولمادي بير كلمه تمنّايه‌ گليم.
من جهنم‌ده ده باش ياسديقا قويسام سنيله ،
هئچ آييلمام كي دوروب جنّت مأوايا گليم.
ننه قارنيندا سنله ائگيز اولسايديم اگر.
ايسته‌‌مزديم دوغولوب بيرده بو دونيايا گليم.
سن ياتيب جنتّي رؤيادا گؤرنده گئجه‌لر،
من ده جنتّده قوش اوللام ، كي او رؤيايا گليم.
قيتيليغ‌ ايللر ياغيشي تك قورويوب گؤز ياشيميز،
كوي عشقينده گرك بيرده مصّلايه گليم.
سنده صحرايه ماراللار كيمي بير چيخ نولوكي ـ
منده بير صئيده چيخانلار كيمي صحرايه گليم.
آللاهيندان سن قورخماييب اولسان ترسا،
قورخورام منده دؤنوب دين مسيحايه گليم.
شيخ صنعان كيمي دونقوز اوتاريب ايللرجه،
سني بير گؤرمك اوچون معبد ترسايه گليم.
يوخ صنم ! آنلاماديم ، آنلاماديم ، حاشا من ،
بوراخيب مسجديمي ، سنله كليسايه گليم!
گل چيخاق طور تجلاّيه ، سن اول جلوهٔي طور،
من‌ ده موسا كيمي اول طوره تجلاّيه گليم.
شيردير شهريارين شعري الينده شمشير،
كيم ، دئير من بئله‌ بير شيريله دعوايه‌ گليم ؟

صبح اولدي هر طرفدن اوجالدي اذان سسي!
گـــويا گليــــر ملائـكه لــــردن قــــرآن سسي!!!
بير سس تاپانميـــرام اونا بنزه ر، قويون دئييم:
بنزه ر بونا اگـر ائشيديلسيدي جـــان سسي !!!
سانكي اوشاقليقيم كيمي ننيمده ياتميشام ...!
لاي لاي دئيير منه آناميـــن مهربـــان سسي !
سـانكي سفرده يم اوياديــرلار كي دور چاتاخ!
زنگ شتر چالير ، كئچه رك كـــاروان سسي!!!
سانكي چوبان ياييب قوزوني داغدا ني چالير !
رؤيا دوغـــور قوزي قولاغيندا چوبـــان سسي !!!
جسميم قوجالسادا هله عشقيم قوجالميوب
جينگيلده ييـر هله قولاغيمدا جـــوان سسي !
سانكي زمان گوله شدي مني گوپسدي يئره
شعريم يازيم اولوب ييخيلان پهلـــوان سسي !!!
آخير زماندي بير قولاق آس عرشي تيتره ديـر ...
ملت لرين هــاراي ، مددي ، الامـــان سسي !!!
انسان خـزاني دير تؤكولور جـان خزه ل كيمي
سازتك خزه ل ياغاندا سيزيلدار خزان سسي !!!
قيرخ ايلدي دوستاغام قالا بيلمز او ياغلي سس ...
ياغ سيز سادا قبـول ائله مندن يــاوان سسي !
من ده سسيم اوجالسا گرك دير ،يامان دئييم ...
ملت آجيخلي دي اوجـــاليبدي يامـان سسي !!!
دولدور نواره قوي قالا ، بيــر گون ، بـو كؤرپه لر
آلقيشلاسينلا ذوق ايله بيزده ن قالان سسي !
مقناطيس اولسـا سسده چكر ، انقلابــــدا باخ !
 آزادليـق آلــدي سرداريميــن قهرمــان سسي !
انسان قوجالميش اولسا ،قولاخلار آغيرلاشار
سانكي يازيق قولاخدا ،گورولدور زمان سسي !
با خ بير درين سكوته سحر ، هانسي بير نــوار
ضبــط ايليـه بيلـــر بئله بيــر جــــاودان سسي ؟
سانجيــر مني بو فيشقا چالانلاردا  شهريـــار  !!!
من نيله ييم كي فيشقـايا بنزه ر ايلان سسي ؟!!!

ترجمه فارسي :

(صبح شد و از هر سمت ، صداي اذان بلند شد ! گويا كه از فرشتگان ، صداي قرآن مي آيد !!! صدايي مثل آن نمي يابم ، بگذاريد بگويم كه اگر صداي جان شنيده مي شد ، به آن شبيه بود !!!)(گويا بسان دوران كودكيم كه در گاهواره آرميده ام ، صداي مهربان مادرم برايم لالايي مي گويد ! يا اينكه در سفر هستم و بيدارم مي كنند كه برخيز تا به مقصد برسيم ! زنگ شتر نواخته مي شود كه كاروان دارد عبور مي كند !!!)(يا اينكه چوپان ، گوسفندان را پراكنده است و در كوه ني مي زند و اين صداي چوپان در گوش گوسفندان رويا مي آفريند !!! اگر جسمم هم پير شده باشد ، هنوز عشقم پير نشده است ! و در گوشم هنوز صداي جواني طنين انداز است !!!)(يا اينكه زمان با من كشتي گرفته و مرا به زمين كوبيده است ! و شعر و نوشته هايم همانند صداي پهلوان به زمين خورده است !!! آخرالزّمان شده و گوش فرا دهيد كه فرياد كمك خواهي مردم ، عرش را به لرزه درمي آورد !!!) (پاييز انساني است و جان ها همانند برگ پاييزي به زمين مي ريزند ! برگ هاي پاييزي وقتي مي ريزند ، پاييز همانند ساز ، ناله سر مي دهد ! چهل سال است كه زنداني ام و ديگر آن صداي مؤثر باقي نمي ماند ! اگر صداي من بي تأثير هم باشد ، تو اين صداي كم ارزش را از من قبول فرما !!!)(اگر صداي من هم بلند شود ، بايد كه فحش بدهم ... مردم گرسنه اند و صداي بد و بيراه بلند شده است !!! اين صدا را در نواري ذخيره كنيد تا اين كودكان ، روزي با شوق تمام به استقبال اين صداي از ما به يادگار مانده بروند !!!)(اگر در صدا جاذبه وجود داشته باشد ، انسان را به سوي خود جلب مي كند ! ببينيد كه در انقلاب ، صداي سردار قهرمان ما ، آزادي را به ارمغان آورد !!! اگر انسان پير شود ، گوشهايش سنگين مي شوند ! و گويا در اين گوش بيچاره ، صداي زمان غرّش مي كند !!!)(هنگام سحر ، به اين سكوت ژرف بنگر كه كدامين نوار ميتواند اين صداي جاودان را ضبط نمايد ؟!!! شهريارا ! اين سوت زن ها مرا نيش مي زنند ! من چه كنم كه صداي مار به صداي سوت شباهت دارد ؟!!!)

قيشين قره قئييدي آليب منيم جانيمي
خورتدان دئييب قوجاليق ، كسيب منيم يانيمي
بو سيگاردا زه لي تك ، دوشوب منيم جانيما
دوداق - دوداقه قويوب ، سورور منيم قانيمي
سازاق سازين قوراراق ، قولاقدي سانكي بورور
چكيبدي ايپليگيمي ، قيريبدي قئيطانيمي
يئنه قيشين قوشوني ، پائيز مارشين چالاراق
كرديمده وارسا بيچير ، لاله مي ريحانيمي
اوشودوم ها اوشودوم، دئيير منيم درديمي
كورسو تووين ايتيريب ، آختارير درمانيمي
پاييزلاميش زمي يم، وريان منه نه گرك
دؤنرگه دؤندره جك ، دؤنديكجه وريانيمي
قوي چالخاسين بيزي بو ، زمانه ئهره كيمي
منيم سودوم چورويوب ، تورشاتسين آيرانيمي
هنر ديلين قلمين ايشدن سالان مني ده
ايشدن ساليب ايتيريب پاك اديمي سانيمي
حيدربابا يولي تك ، يول باغلانيب اوزومه
آوچي فلك آولاييب سررويله جئيرانيمي
نازلي ياريم گئده لي ، سؤنوب منيم چيراغيم
خان وارسادا نه كاري ، ائوين كي يوخ خانيمي
مريم كؤچوب گئديبن شهرزادينم دا گئدير
فلك اليمدن آلير ، درريمي مرجانيمي
يئتيم تك اوز - گؤزومي نيبت باسيب باساجاق
يامان قاريشديرياجاق ، سلقه مي ، سهمانيمي
نه ديز وار كي سورونوم، نه اوز واركي قاييديم
نه يوك قاليب نه يابي ، سويوبلا كروانيمي
ائلدن مني قئوجاليق ، آزقين ساليب ، سالاجاق
ايتيردي تبريزيم ، اودوزدو تهرانيمي
بيزيم ده چايخاناميز ، چاي تؤكررك قوناغا
دولدوردي زردآب ايله ، منيم ده فنجانيمي
قليانلا شهرياريم غمي قالدير باقاليم
من ده خورولداديرام ، غم باسدي قليانيمي

هر چند قوتولماق هله يوخ دارليغميزدان
اما بير آزادليق دوغولوب وار ليغميزدان
(وارليق)نه بيزيم تكجه آزادليق قوشوموز دير
بير مژده ده وئرميش بيزه همكار ليغميزدان
به به نه شيرين ديللي،بو جنت قوشي،طوطي
قندين آليب الهام له ديندار ليغميزدان
ديل آچامدا كارليق داگئدر،كورلوغلوموزدا
چون لا لليغميز دوغموش ايدي كار ليغميزدان
دشمن بيزي ال بير گؤره،تسليم اولي ناچار
تسليم اولوروق دشمنهناچار ليغميزدان
هر انقلابين وور- ييخي صون بناليق ايسته ر
دستور گرگ آلماق داها معمار ليغميزدان
هشيار اولاسوز،دشمني مغلوب ائده جكسيز
دشمنلريميز قورخوري هشيار ليغميزدان
بيرليك يارادون،سؤز بير اولاربيز كيشي لرده
يوخلوقلاريميز بيتديره جك وار ليغميزدان

يغدي خير و بركت سفره سين ، احسانيله گئتدي
امن - امانليق دا يوكون باغلادي ، ايمانيله گئتدي
بيك - خان اولمازسا دئيه رديك اولاجاق كنديميز آباد
او خاراب كند ده ولاكن ، ائله بيك خانيله گئتدي
( سيلو ) داير اولالي ، هرنه دگيرمان ييغيشدي
آمما خالص - تميز اونلاردا ، دگيرمانيله گئتدي
مستبد سلطاني سالدوق ، كي اولا خلقيميز آزاد
سونرا باخديق كي آزادليق دا او سلطانيله گئتدي
بير ( بلي قربان ) اولوب ايندي بيزه مين بلي قربان
آمما ( خلعت وئرن ) اول بير بلي قربانيله گئتدي
دوز مسلمانه دئييرديك ، قولاغي توكلودي بدبخت
ايندي باخ ، گؤر كي او دوزلوك ده ، مسلمانيله گئتدي
وئرمه ( صابر) دئدي ، او دولما - فسنجاني آخوندا
آغزيميزدان داد ، اول دولما - فسنجانيله گئتدي
دئدي انسانيميز آزدير ، هامي انسان گرك اولسون
آمما انسانليقيميزدا ، او آز انسانيله گئتدي
بو قدر ( دفتر ) و ( استاد) له ، بير حقه چاتان يوخ
حق وئرنلر ( پيتيگي ) ميزا قلمدان يله گئتدي
بيزه بير دين قالا بيلميشدي ميراث ، بيرده بو ايران
دين گئده نده دئدي : تك گئتمه رم، ايرانيله گئتدي
ايسته ديك قانلا يوواق اؤلكه ميزين لكه سين ، آمما
اؤلكه ميز خالص اؤزي لكه اولوب قانيله گئتدي
يورقاني اوغري قاپاندا ، دئدي ملانصرالدين
نيله سين چيلپاغيدي ، اوغرو دا يورقانيله گئتدي
هاوا انسانمي بوغور باش - باشا گاز كربنيك اولموش
يئل ده اسمير ، ائله بير ، يئل ده سليمانيله گئتدي
سو ، كرج دن كلور ايله گلي بو پاسلي دميردن
گؤره سن شاه سوي تك چشمه نه عنوانيله گئتدي؟
تركي اولموش قدغن ، ديوانيميزدان دا خبر يوخ
شهريارين ديلي ده واي دئيه ، ديوانيله گئتدي

يار گونومي گؤي اسگييه توتدو كي دور مني بوشا
جوتچو گؤروبسه ن اؤكوزه اؤكوز قويوب بيزوو قوشا ؟
سن الليني كئچيب ياشين ، من بير اوتوز ياشيندا قيز
سؤيله گؤروم اوتوز ياشين نه نيسبتي اللي ياشا ؟
سن يئره قويدون باشيوي من باشيما نه داش ساليم ؟
بلكه من آرتيق ياشاديم نئيله مه لي ؟ دئديم ياشا
بيرده بلالي باش نچون يانينا سوپورگه باغلاسين؟
بؤركو باشا قويان گرك بؤركونه ده بير ياراشا
بيرده كبين كسيلمه ميش سن منه بير سؤز دئمه دين
يوخسا جهازيمدا گرك گلئيدي بير حوققا ماشا
دئديم : قضا گليب تاپيب ، بير ايشيدي اولوب كئچيب
قوربانام اول آلا گؤزه ، حئيرانان اول قلم قاشا
منكي اؤزومده بير گوناه گؤرمه ييرم ، چاره ندير ؟
پيس بشرين قايداسي دير ، ياخشي ني گؤرسه دولاشا
دوستا مروت ائتمه لي دوشمه نيله كئچينمه لي
قايدا بودير ، حئيف دئگيل بشر يولون آشيب چاشا ؟
من ده سنين داي اوغلونام سن ده منيم بي بيم قيزي
گؤنول باخيرسا گونه شه ، گؤزده گرك بير قاماشا
ايندي بيزيم مارال كيمي ، اوچ بالاميز واردي ، گرك
آتا – آنا ساواشسادا ، بونلارا خاطير باريشا
هر كيشي يه عيالي دا ، اؤز جاني تك هؤروكلنيب
هديه ده اولماز ائله سين عيالي قارداش قارداشا
بو دونيا بير يول كيمي دير ، بيز آخرت مسافيري
كجاوه ده هاماش گرك اؤز هاماشينان ياناشا
آخيرتي اولانلارين ، دونياسي غم سيز اولمويوب
سئل دي گله ر آخار كئچر ، آمما گرك آشيب – داشا
مثل دي : « يئر كي برك اولور ، اؤكوز اؤكوزدن اينجييور »
هي دارتيلير ايپين قيرا ، يولداشيلا بير ساواشا
بيزيم ده روزيگاريميز يامان دي ، بيزده عيب يوخ
بلكه وظيفه دير بشر قونشولاريلان قونوشا
حق حيات يوخ داها بيزلره ، چوخ بؤيوك باشي
زندانيميزدا حققيميز ، بير باجا تاپساق ، تاماشا
آمما اونون شماتتي آللاها خوش گلميوبن
گئتدي منيم حياتيمي ووردي داشا چيخدي باشا 

برق اولمادي ” قيزيم گئجه يانديردي لاله ني
پروانه نين ” اودم ده باخير ديم اداسينه
گؤردوم طواف كعبه ده يانديقجا يالوارير
سؤيلور : دؤزوم نه قدر بو عشقين جفاسينه ؟
يا بو حجاب شيشه ني قالديركي صاورولوم
يا سوندوروب بو فتنه ني ” باتما عزاسينه !
باخديم كي شمع سؤيله دي : اي عشقه مدعي !
عاشق هاچان اولوب يئته اؤز مدعا سينه ؟
بير يار مه لقادي بيزي بئيله يانديران
صبر ائيله يانديران دا چاتار اؤز جزاسينه “
اما بو عشقي آتشي عرشيدي ” جاندادير
قوي يانديريب خوديني يئتيرسين خداسينه

ايل كئچدي، باهار اولدو، خبر يوخ گولوموزدن،
گول آچمادي، قووزانمادي سس بولبولوموزدن.
بايرام گونوموز، ياسلى گؤروشلرله كئچر كن،
شادليق نه اوماق بيز آييميزدان ايليميزدن
تقويم آلابيلمم اله، گؤردوم منه تقويم،
«گؤزداغ» دىكى (تقويمى) ده گئتدى اليميزدن.
بيز باغچاميزى بئليه بيلليك؟ داهاهيهات!
نايميد اجلين بئلداري وورموش بئليميزدن
(تقويمى) اولاردان دي كى، ياددان چيخابيلمز،
ياددان نئجه چيخسين، آدى دوشمور ديليميزدن
ائل ايچره، باشى بيريئره گاهدان اوييغاردى،
اوگئتدي، ييغينجاق دا ييغيشدي ائليميزدن
يولداش سپه لندى، ائله بيل سام يئلى اسدى،
سرسام دى قالان بيزلره، بوسام يئليميزدن
دنيا نه يامان تاپماجا ديرباش چخاران يوخ،
بيزباش تاپاق آنجاق، بوقوبول- منقلميزدن.
(تقويمى) كيمى دوز كيشى؟ هيهات تاپيلماز،
بير شمع دى كى، كؤچدو بيزيم محفيليميزدن
اوچ نازلى بالا، همسر ايله قالديلا- باشسيز،
يانساق دا اود ال چكميه جكدير كولوموزدن.
بير (كافيه) اوندان باجارى يادگار اولسون
باش يولمادا، بيرتئلدي قالان كاكيلميزدن
ائل بيرده دئسين: «سئل سارانى قاپدى قاچيرتدى»،
آغلاشدى بولودلاردا بوداشقين سئليميزدن
بير مزرعه دير (شهريار) ين عومرو، نه حاصل،
سئل، قويمورو بيرچؤپ ده قالا حاصيليميزدن

بير گون آغيز قالار بوش
بير گون دُولي داد اُولار
گون واركي هئچ زاد اولماز
گون واركي هر زاد اولار
بختين دورا باخارسان
ياديار قوهوم قارداشدي
آمما  بختين  ياتاندا
قوهوم  قارداش  ياد  اولار
چاليش آدين گلنده
رحمت اوخونسون سنه
دونيادا  سندن  قالان
آخيردا  بير آد اولار
گُوردون ايشين اَگيلدي
دورما ،اَكيل،گؤزدَن ايت
دوستون گؤره ر داريخار
دوشمن گؤره ر شاد اولار