دوست دئييب گزمه

كؤنول, نه گزيرسن سئيران يئرينده,
عالمده هر شئيين وار اولمايينجا.

اولورا-اولمازا دوست دئييب گزمه,
بير عهدينه بوتون يار اولمايينجا.

يورو, صوفي, يورو, يولوندان آزما,
ائلين قئيبتينه قويولار قازما.

يورولما بيهوده, بوشونا گزمه,
يانيندا مورشيدين يار اولمايينجا.

قالخدي, هاوالاندي كؤنولون قوشو,
قووبا, قئيبت ائتمك گؤنتونون ايشي,

اوستادين تانيماز بوندا هر كيشي,
اونون كيم, مورشيدي ار اولمايينجا.

واريب بير كؤنتويه سن اولما نؤكر,
چرخينه دؤگر ده دولونو دؤگر,

نه خودادن قورخار, نه حجاب چكر,
بير كؤنتوده ناموس, آر اولمايينجا.

شاه خطاي, ائديم بو سيرري بَيان,
كاميلميدير جاهيل سؤزونه اويان?

بير باشدان آبلاماق عومره‌دير زيان,
ايكي باشدان موهوبب, يار اولمايينجا.

وارساغيلار
قايبدن دليل گؤروندون,

دده‌م, خوش گلدين, خوش گلدين!
بيزي سئويب سئوينديردين,

دده‌م, خوش گلدين, خوش گلدين!
ايكي جان ايديك بيرلشديك,

محبت قاپيسين آشديق,
شوكور ديدارا ايريشديك,

دده‌م, خوش گلدين, خوش گلدين!
اوستوموزه يول اوبراتدين,

گؤوهر آلدين, گؤوهر ساتدين,
ارليگيني اثبات ائتدين,

دده‌م, خوش گلدين, خوش گلدين!
بير آباجدا گوللر بيتر,

داليندا بولبوللر اؤتر,
شاهيما برگوزار گئدر,

دده‌م, خوش گلدين, خوش گلدين!
بويله, شاه خطايم, بويله,

پيريم دستور وئرسين سؤيله,
شاها مندن نياز ائيله,

دده‌م, خوش گلدين, خوش گلدين!
بير گؤزه‌لين ووجودونون شهرينه,

باخ, نظر ائيله ده همن عاريف اول,
دوكانيندا دئديگين متاينا,

باخ, نظر ائيله ده همن عاريف اول.
سئير ائت اؤزگه ارنلرين گؤره‌سين,

طبيب سارار يورگيمين ياره‌سين,
چرب ائيله‌مه محبتين چاره‌سين,

باخ, نظر ائيله ده همن عاريف اول.
هرجايي گؤزله قوشما باشيني,

هرجاييليك ائديب, آتار داشيني,
موشتري بولورسا, سؤز قوماشيني,

باخ, نظر ائيله ده همن عاريف اول.
خطاي دئر: - رحم ائتمزم يالانا,

اؤزون تسليم ائدر كندي گلنه,
آي اليدير, گون موهممد بيلنه,

باخ, نظر ائيله ده همن عاريف اول.