شاطر اوغلان

شاطر اوغلان گوروم آللاه سنه وئرسين بركت
قوي اونون ياخشي النسين ،خميرين اللنسين
چوخ پيشير ياخشي پيشير گويده قيريلدات كوره يي
منبر اوسته چوره يين قوي قالانيب تللنسين
تنديرين طور تكين عرشيده ن آلسين ايشيغي
ارسينين بيرق احرار كيمي ميللنسين
كاسيبين قيسمتي يوخ ياغلي پيلوو دوشله ماغا
بو ياوان سنگه يي بيرقوي ساحاليب سئللنسين
قيرتين قورباني سن موشتريني تئز يولا سال
ائل ايچينده ياراماز آرواد اوشاغ وئللنسين
قوي ايكيريالليغي ساتسين خوزه ئين بير ماناتا
ديشي دوشموش قوجانين آغزي نه دير ديللنسين
او منيم شعريمه چوخ ماييل اولان وردسته
دئنه: شاعير چوره يي قوي قوروسون گوللنسين
من ليغيرسا يئيه بيلسم ده فلوس لازيم اولار
بو سوسوز باخچا نه لازيم بو قده ربئللنسين
ساري يازليقدان اولان گوللي قيزارميش سنگك
گره ك آغزوندا اريك تك ازيليب هللنسين
تهرانين غيرتي يوخ شهريار ساخلاماغا
قاچمشام تربيزه تا ياخشي يامان بللنسين
باغچاميز فاسد اولوب ، هر نه ااكرسن اولماز
يئري داشليقدي گره ك توپراقي غربيللنسين
مدعاسي چوخ اولان طبل تهي پربادوخ
نيله يك ضرناچي نين بورنو گره ك يئلله نسين
بو گيجللنمه دن آي چرخ فلك سنده يورول
بو حياسيز گونه گوزلر نه قده ر زيللنسين
سعدي نين باغ گلستاني گره ك حشره قده ر
آلماسي سلله لنيب خرماسي زنبيللنسين
لعنت اول باد خزانه كي نظامي  باغينين
بير ياوا گلبسرين قويمادي كاكللنسين
آرزو جلگه لرينده بيز اكن مزرعه لر
دئييه سن ساقه لنيب قوي هله سنبللنسين
قصه چوخ قافيه يوخ آختاريرام تاپميورام
يئريدير شهريارين طبعي ده تنبللنسين