هلال محرم

محرم دير ، خانيم زينب عزاسي
بيزي  سسلر  حسينين   كربلاسي
يولي  باغلي  قاليب  دشمن الينده
داها زوارينين يوق سس- صداسي
( بوگون كرب بلا ويران اولوب دير )
(حسين أوز قانينا غلطان اولوب دير )
چاغير شاه  نجف گلسين  هرايه
جهاديله  آچاق  يول  كربلايه
علي نين  ذوالفقاري داده چاتسين
حسين قربانلاري گلسين منايه
( بوگون كرب بلا ويران اولوب دير )
(حسين أوز قانينا غلطان اولوب دير )
 جهاد ميداني دير، ملت دايانسين
مسلمان خواب غفلتدن اويانسين
اوجالسين    نعره      الله اكبر
گرك  كافر جهنم ايچره  يانسين
( بوگون كرب بلا ويران اولوب دير )
(حسين أوز قانينا غلطان اولوب دير )
 گليب غيرت گوني ، همت زماني
اوجالداق   باشدا  آذربايجاني
گئده ك   صدام   كافرله  جهاده
ييخاق بو بي مروت ائو ييخاني
( بوگون كرب بلا ويران اولوب دير )
(حسين أوز قانينا غلطان اولوب دير )
 حسين زواري نين قورتاردي صبري
قيراق بو قوردلاري ، كافتاري ، بيري
آچاق  يول  كربلايه ، كاظمينه
چكك  آغوشه  او شش  گوشه  قبري
( بوگون كرب بلا ويران اولوب دير )
(حسين أوز قانينا غلطان اولوب دير )
 گرك دين اولماسا ، دونياني آتماق
شرف ،عزتلي بير دونيا ياراتماق
سعادت دير حسين قربانلاري تك
شهادتله   لقاء   اللهه   چاتماق
( بوگون كرب بلا ويران اولوب دير )
(حسين أوز قانينا غلطان اولوب دير )
مسلمان صف چكيب دعوايه گلسين
چاغير عباسي  تاسوعايه  گلسين
قيزي زينب أوزي  صاحب عزادير
چاغير زهراني عاشورايه گلسين
( بوگون كرب بلا ويران اولوب دير )
(حسين أوز قانينا غلطان اولوب دير )
 آنا ! اوغلون شهيد اولدي مبارك
شهادتله سعيد اولدي ، مبارك
اميد  جنتين  تاپدين ، دا سندن
جهنم  نااميد  اولدي ، مبارك
( بئله طوي كيم گؤروب دنياده قاسم )
( طويي ياسه دؤنن شهزاده قاسم )