قافقازلي قارداشلار ايله گوروش

اي صفاسين اونودمايان قافقاز
گلميشم ذوق آلام مراقيندان
غيرتي جوشغون اولمايان نه بيلير
كي نه لر چكميشم فراقيندان
اوخوروق بيز سيزين ترانه لري
يادگار عمرلردن ايللردن
باكينين سوز-سويي حكايه لري
دوشمز ايللر دويونجا ديللردن
سازيمين غملي سيملرينده منيم
باكي نين باشقا بير ترانه سي وار
سينه مين دار خرابه سينده درين
بو جواهرلرين خزانه سي وار
سن كيمي قارداش اوز قارينداشيني
آتماييب اوزگه كيمسه توتماياجاق
قوجا تبريزده يوزمين ايل كچسه
باكي قارداشلارين اونوتماياجاق
گلميشيك دوغما يوردوموز باكيا
قوي بو تاريخده افتخار اولسون
شهريارداندا بو افقلرده
بو سينيق نغمه يادگار اولسون